كبرت ورضيت بمكتوب ربي ’ الحمد لله ياك هو العليم .
حياتي بدات فالتسعين’ مور عام من زواج والديا’ لي ماكانوش عارفين.. بلي الناس عليا راح يولوا يقولوا مسكين...
أنا الطفل اللول عندهم شحال كانوا بيا فرحانين’ شحال كانو يخافو عليا وفيا متهليين’ حياتهم حلوة وبيناتهم شخال كانو متحابين متحابين.
يا حصرى كي نشوف تصاوري معاهم يبوسوا فيا ومعنقين.. تصاوري كي قفلت عام والله الدمعة الطيح من لعين.
هاد الفرحة والضحكة لي تم تم راحت مادامتش عامين’ بابا الله يرحمو توفى فأكسيدون بطونوبيل.
خلاني صغير والمشكل خلى يما رافدة ختي بالجوف فالشهرين’ ومن الحرقة والبكى يما نسات روحها
مينداك وين كانوا يسمعو صوتها لحنين.
* مسكينة التكوات و جوزت بالبكا والوحش 7 شهر تاع الجوف لخرين ’ أو واحد ما كان ضان بلي مكتوبها لحق , الله يرحمها زيدت وماتت وسماوها عليها ختي نسرين .
تربيت انا وختي فدار جدي .. صح كانوا يحبونا بصح وحش والديا مازال للدك عندي ...
كي لحقت للخمس سنين ختي كانت فالعامين .. صح ماكنتش نعرف بصح دايما نسقسيهم بابا ويما وين راحوا وين .
شحال نبكي كي نتفكر بلي ما سمعوش مني لكلمات لي نطقت بيهم اللولين .. بابا وماما معرفتكمش بصح فالقلب تقعدوا ساكنين.
دخلت نقرا كنت نشوف صحابي مع باباهم كانوا فرحانين .. وانا خطرة يستناني خالي خطرة جدي صح نحبهم بصح ماشي كيما لوادين.
مانحكيلكمش فالعيد كي نلقا روحي وحدي ونشوف الناس متلامين ..
كنت نقول علاش غير أنا ماكنتش عارف بلي كاين لي كتر مني ولربي حاممدين .
بديت نكبر أو وليت قبيح مشارجي فقلبي كي دخلت للسيام .. ديما مازالهم فالبال و تصويرتهم مازال اجيني
فالمنام .. وشحال كنت نكره كي ينساو ويقولولي جيب باباك كي ندير كاش بروبلام ..
كملت قرايتي فالسيام عاودت زوج خطرات وجبت لبيام ..
كنت حابهم يكونوا معايا يفرحو بيا ويكونوا جنبي عالعام ..
.
دخلت لليسي وبديت نعقال . رضيت بالمكتوب كبرت وتبدل التخمام ..
ختي مازالها تغيضني كي نشوفها نتفكر يما ونتفكر هادوك ليام ..
.
ودوك حمد لله جبت الباك ودخلت للافاك .. نقرا قيس قيس مخرجتش كراك
الله غالب كنت قادر ندير ماكتر بصح لازم تقرا وتخدم ايدا راحلك باباك.
صح في حياتي عانيت.. من الوحش قاسيت.. مكتوب ربي نحمدو ونشكروا بصح صح سوفريت .
خويا فاللخر على حاجة نوصيك .. حوس على اليتيم ماتخليهش حتى هو يجي ليك . كاين بزاف لي راهم
يعانيو وايدا درت فيهم الخير’ الخير هاداك راح يولي ليك.
اللي قراها كامل يعطيه الصحة .. هادي حكاية وحدة وكل واحد تلقى عندو حكاية تبكيه.. واللي يعرف
كاش يتيم ولا محتاج يسيي يوقف معاه يالوكان بحاجة قليلة .. مام ايدا ماعندكش الدراهم عاونهم معنويا
وهاد الشي يكفيك...
شكرا للجميع وسلام
طلبة جامعة منتوري قسنطينة 
الإثنين 14 يناير 2019 - 0:15 من طرف boufris
